Иске Иштирәк мәктәп урманчылыгында тәрбияләнүчеләр яшь натуралистларның республика слетында катнаштылар

2024 елның 16 октябре, чәршәмбе

14 октябрьдән 16 октябрьгә кадәр яшь натуралистларның республика слеты булып узды, анда Иске Иштирәк мәктәбенең «Яшь урманчылар» мәктәп урманчылыгы укучылары һәм аларның җитәкчесе Галәветдинова Рушания Котдус кызы актив катнашты.

Слетның беренче көнендә яшь натуралистлар «Байтиктагы маҗаралар» квестын үттеләр, иҗади номерлар конкурсында катнаштылар, ә команда җитәкчеләре мастер-класста катнаштылар. Икенче көнне слетта катнашучылар үзләренең конкурс эшләрен якладылар, экскурсиягә бардылар. Җитәкчеләр һәм педагоглар өчен «Юннат отрядының көчле сыйфатлары һәм продуктив эшчәнлеге»темасына семинар узды. «Тыюлык сукмаклары» конкурсында өченче урынны «Яшь урманчылар» мәктәп урманчылыгы җитәкчесе Галәветдинова Рушания Котдус кызы алды.

Махсус призга тикшеренү эшләре өчен Галләмова Айгизә лаек булды. Котлыйбыз! Исегезгә төшерәбез, Татарстанда яшь натуралистлар хәрәкәте эшчәнлеген активлаштыру эше 2018 елдан бирле алып барыла. Чаралар «Экология» илкүләм проектының максатларына ирешүгә ярдәм итә.