Лениногорскида «Стоп ВИЧ/СПИД» акциясе төгәлләнде

СПИДка каршы көрәш көне алдыннан “Логос” балалар һәм яшьләргә психологик ярдәм күрсәтү үзәге белгечләре һәм волонтерлары тарафыннан да шактый чаралар уздырыла. Шуның берсе -«Стоп ВИЧ/СПИД» акциясе. Күптән түгел үзәк белгечләре шәһәребездәге бер һөнәри белем бирү йорты студентлары арасында социологик сораштыру уздырган. Анда 16-20 яшьлек 432 студент катнашкан.

Максатлары-яшьләрнең әлеге проблема турында белү-белмәүләрен тикшерү. Сораштырылганнарның бөтенесе дә бу авыруның иярү юллары турында белүен әйткән. Күпчелеге бу турыда телевизион тапшырулар, интернет челтәре аша белгән, шулай ук әти-әниләре, табиблар, укытучылар ярдәме белән мәгълүмат алучылары да булган. Сораштырылган яшьләрнең шактые ВИЧ-инфекциялеләргә тискәре мөнәсәбәттә булуын әйткән. “СПИД белән авыручыларны, ВИЧ-инфекциялеләрне җәмгыятьтән аерырга кирәкме?” дигән сорауга 80 проценты “әйе” дип җавап биргән. Анкета нәтиҗәләре яшьләр бу проблема турында шактый яхшы беләләр, дигән нәтиҗәгә китерде, ди “Логос” белгечләре.