Лениногорскида чыгарылыш кичәсе үтте
Лениногорск шәһәренең үзәк мәйданында шәһәр һәм район мәктәпләрен тәмамлаучылар өчен тантаналы линейка булды. Бу көнне 337 укучы тулы урта белем турында аттестатлар алды.
Сәламләү һәм котлау сүзләре белән чыгарылыш сыйныф укучыларына Лениногорск районы Башлыгы, шәһәр мэры Рәгать Хөсәенов мөрәҗәгать итте.
- Сез әти-әниләрегез һәм укытучыларыгыз белән бергә бик мөһим тормыш этабын үттегез. Бердәм дәүләт имтиханнары артта калды. Сез бу сынауны лаеклы үттегез һәм яхшы нәтиҗәләр күрсәттегез. Бу бик әйбәт. Әмма иң мөһиме-сезнең һәрберегез тормышта үз урынын тапсын, илебезнең яшь буынының лаеклы вәкиле, яхшы кеше булсын, - диде ул.
Мәгариф идарәсе җитәкчесе Вагиз Санатуллин катнашучыларны чыгарылыш сыйныф укучыларының уңышлары белән таныштырды. БДИда 100 балл алган балаларны билгеләп үтте. Алар-12нче лицейны тәмамлаучылар Артур Нургалиев, Ильвина Төхфәтуллина, Екатерина Вуколова, 2нче мәктәпне тәмамлаган Анна Воробьева һәм аларның укытучылары Елена Викторовна Родионова һәм Ирина Владимировна Бурдина. Җиде укучы рус теле, математика һәм тарих буенча 98 балл җыйган.
Тантаналы шартларда 50 дән артык чыгарылыш сыйныф укучыларына «Укудагы аерым уңышлары өчен" медальләре тапшырылды.
Бүләкләү концерт номерлары, театральләштерелгән тамаша белән үрелеп барды.