Лениногорскида балигъ булмаганнар арасында җинаятьләрне профилактикалау чаралары турында фикер алыштылар
Лениногорскиның 2нче мәктәбендә Татарстан Республикасы Дәүләт Советы депутаты Ирек Ханипов инициативасы белән «Балигъ булмаганнарга карата, шул исәптән мәгълүмати-телекоммуникацион технологияләрне кулланып, җинаятьләр кылуны профилактикалау. Җинаять корбаннарын реабилитацияләү өчен күрелә торган чаралар» темасына киңәшмә узды .
Чарада район башлыгы урынбасары Сергей Тимаков, Эчке эшләр бүлегенең җәмәгать тәртибен саклау буенча полиция начальнигы урынбасары Артем Ермошкин, Лениногорск шәһәре прокурорының баш ярдәмчесе Людмила Сөләйманова, «Юл хәрәкәте иминлеге» ДБУ бүлекчәсе начальнигы Эльвира Кирдянова, шулай ук ата-аналар һәм мәктәп укучылары катнашты.
Мәктәп директоры Ольга Платонова, очрашуны ачып, ассызыклаганча, мондый җыелышлар — беренче чиратта диалог.
"Ата-аналар үз балаларына игътибар итәргә, аларның проблемалары белән кызыксынырга һәм урам төп тәрбияче булмасын өчен ял итүне планлаштырырга тиеш. Безнең уртак максат-балаларны ничек нәтиҗәле яклау, аларның үз-үзләрен тотышындагы үзгәрешләрне сизеп алу һәм мохитне куркынычсыз итү. Әгәр без балаларны тәрбияләсәк, аларны тирә — юньдәгеләрне хөрмәт итәргә өйрәтсәк, аларның законны бозу теләге тумаячак», - дип билгеләде Ольга Платонова.
Киңәшмә барышында актуаль мәгълүматлар яңгырады: бүгенге көндә районда 13 800 бала яши, шуларның 8 500е — мәктәп укучылары. Балигъ булмаганнар эшләре буенча бүлекчәдә имин булмаган гаиләләрдән 51 бала һәм 92 ата-ана исәптә тора.
Людмила Сөләйманова ата-аналарның игътибарын хокук саклау органнары белән конструктив хезмәттәшлекнең мөһимлегенә юнәлтте:
" ПДН хезмәткәрләре сезнең балаларыгыз белән профилактик чаралар үткәрә, алар хаталар ясамасын өчен. Әгәр сез, ата-аналар, үзегезне начар яктан күрсәтсәгез, бу балаларның үз-үзләрен тотышына да йогынты ясаячак. Балаларыгызның киләчәгендә чагылырга мөмкин булган гамәлләр кылмагыз. Балаларыгызны яратыгыз, алар белән дус булыгыз, аларның эшләре белән кызыксыныгыз. Балалар - бездә булган иң мөһим әйбер".
Артем Ермошкин соңгы елларда балигъ булмаганнар тарафыннан кылынган җинаятьләр турында сөйләде, алар арасында — талаулар, һөҗүмнәр, наркотиклар сату һәм террорчылык актлары. Ул ата-аналарны балаларының телефоннарын тикшерергә, алар кече яшьтә булганда аларның аралашуын контрольдә тотарга чакырды.
Киңәшмәдә юллардагы куркынычсызлыкка аерым игътибар бирделәр. «БДД» ДБУ бүлекчәсе начальнигы Эльвира Кирдянова Лениногорск районында питбайклар һәм квадроцикллар катнашындагы фаҗигале очраклар статистикасын китерде. Әти-әнисе туган көненә питбайк бүләк иткән 14 яшьлек егетнең үлеме турындагы ролик күрсәтелде.
"Хөрмәтле ата-аналар, балаларыгызны саклагыз. Безнең бүләкләр алар өчен һәрвакытта да файдалы була алмый", - дип мөрәҗәгать итте Эльвира Сергеевна җыелганнарга.
ТР Дәүләт Советы депутаты Ирек Ханипов балалар куркынычсызлыгы мәсьәләләренең республика җитәкчелегенең шәхси контролендә булуын ассызыклады, шулай ук «Татнефть» компаниясенә районда үсеп килүче буынны тәрбияләү өчен уңайлы мохит булдыруга керткән өлеше өчен рәхмәт белдерде.
"Эльвира Сергеевнага күрсәтелгән ролик өчен рәхмәт белдерәм. Мондый мисаллар куркынычсызлыкны сакларга һәм хаталар ясамаска кирәклеген исбатлый. Бакча яшеннән үк балаларның үз-үзләрен тотышына игътибар итәргә кирәк. Бары тик уртак эш кенә киләчәктәге фаҗигаләрне булдырмаска ярдәм итәчәк", - дип билгеләде ул.
Район башлыгы урынбасары Сергей Вячеславович киңәшмә йомгаклары буенча балаларны нәтиҗәле яклау гаилә, мәктәп һәм хокук саклау органнары көчләрен берләштергән очракта гына мөмкин булуын билгеләп үтте.