Лениногорск районы территориясендә борщевик үсә торган территория мәйданы 11 гектардан артык тәшкил итә

2025 елның 27 июне, җомга

Сосновский борщевик белән ничә ел көрәшсәләр дә, ул бирешергә уйламы

Иң начары шул: борщевик – балтырган бик тиз арада тарала, ул биләгән мәйданнар елдан-ел арта.

Лениногорск районында Сосновский борщевик үсә торган территория мәйданы 11 гектардан артык тәшкил итә, дип хәбәр итә Россельхозцентрның Лениногорск бүлеге.

«Борщевикны Глазово авылында (2,59 гектар), Үрнәктә (2,62 га), Петропавловкада  (2 гектар), Сугышлыда (0,89 га), Иске Иштирәктә  (0,52 га),  Сходнево-Чертанлада  (0,75 га),  Иске Кувакта (0,2 га),  Кузьминовкада  (2 га) очратырга була», – ди Россельхозцентрның Лениногорск бүлеге җитәкчесе Алмаз Мәүлетов.

Россиядә балтырганның 15 төре үсә. Хәтта аның кайберләрен ашарга да ярый, файдалы үсемлек булып санала. Ә менә «Борщевик Сосновского» дигәне агулы икән. Үсеш чорында әлеге  үсемлектә актив агулы матдәләр хасил була. Согы кеше яки мал тиресенә эләксә, тәнне пешерә. Саклану чарасын күрмәгән очракта пешү бик каты булырга да мөмкин.

Әлеге чүп үләненә  сулыклар, ташландык җирләрдә, юл читләрендә, авыр үтеп керә торган урыннарда, шулай ук торак пунктларда  аеруча интенсив таралганлыктан аның белән көрәшү кыенлаша да. 

«Үсемлекләрнең биологик үзенчәлекләрен исәпкә алып, борщевик белән эш иткәндә  индивидуаль саклану чараларын (капюшонлы су үткәрми торган костюм, резин итекләр һәм перчаткалар, күзлекләр, респираторлар һәм маскалар) кулланып, махсус киемдә үткәрергә кирәк

Үсемлекне юк итү эшен иртә сәгатьләрдә яисә кич белән, һава температурасы кимегәндә башкару яхшырак.

Борщевик суы тирегә эләксә, аны мөмкин кадәр тизрәк сабын белән юарга һәм, һичшиксез, табибка мөрәҗәгать итәргә кирәк. Сосновский борщевикны юк итү өчен җәлеп ителгән затлар бу үсемлекнең куркыныч үзлекләре белән танышырга һәм  куркынычсызлык техникасы буенча инструкция үтәргә тиеш.

• Сосновский борщевик күргән очракта, аңа кагылмагыз, ә Татарстан Республикасы «Россельхозцентр» учреждениесенең Лениногорск  бүлегенә мөрәҗәгать итегез.
• 📞 8 (85595) 3-41-84 (Мавлетов Алмаз Мөкатдәс улы)