Лениногорск районы китапханәләрендә Габдулла Тукайның 139 еллыгын билгеләп үттеләр
21 һәм 23 апрель көннәрендә Г. Тукай исемендәге Үзәк китапханәнең милли-туган якны өйрәнү бүлеге хезмәткәрләре 3 нче урта гомуми белем бирү мәктәбендә һәм 11 нче гимназиядә кызыклы әдәби квест үткәрделәр.
21-24 апрель көннәрендә Г.Тукай исемендәге Үзәк китапханә хезмәткәрләре 4, 5, 12, 20 һәм 26 нчы мәктәпкәчә учреждениеләрдә балалар өчен мавыктыргыч чаралар үткәрделәр. "Тукай әкиятләре буенча сәяхәт" исеме астында алар нәниләрне күренекле татар шагыйре Габдулла Тукайның тормышы һәм иҗаты белән таныштырдылар.
Атна Мәдәният сараенда тантаналы бәйрәм белән тәмамланды.
Шәһәрнең һәм районның иҗат элитасы, шигърият сөючеләр, балалар бакчаларында тәрбияләнүчеләр, мәктәп укучылары, студентлар, бөек татар шагыйрен искә алу өчен халык һәм кунаклар җыелды.
Чарада җирле шагыйрьләр һәм язучылар катнашты. Укучылар Габдулла Тукай шигырьләрен укыдылар, ә яшь артистлар театраль куелышлар күрсәттеләр.
Шулай ук Габдулла Тукай исемендәге Үзәк китапханәдә узган «Моңлы Тукай теле» муниципаль конкурсында җиңүчеләрне бүләкләделәр.
Бәйрәм «Туган тел» җырын башкару һәм шагыйрь һәйкәленә чәчәкләр салу белән тәмамланды.