Лениногорскида «Татар кызы–2025» һәм «Татар егете–2025»муниципаль конкурслары узды
Үзәк китапханәдә традицион «Татар кызы» һәм «Татар егете–2025»муниципаль конкурслары узды.
Чарада Лениногорск һәм Лениногорск районының алты мәгариф учреждениесеннән: Лениногорск музыка-сәнгать педагогика көллиятеннән, Лениногорск нефть техникумыннан, Лениногорск политехника көллиятеннән, Тимәш мәктәбеннән, Куакбаш мәктәбеннән, Иске Иштирәк мәктәбеннән талантлы егетләр һәм кызлар катнашты.
Катнашучыларга сәламләү сүзе белән Лениногорск шәһәре башлыгы урынбасары Урманова Галия Котдус кызы мөрәҗәгать итте:
"26 апрельдә Татарстан Республикасында Габдулла Тукайның тууына 139 ел һәм туган тел көне билгеләп үтелә. Туган телне саклау - мөһим бурыч, чөнки тел милли үзаң белән тыгыз бәйләнгән һәм кешенең үз-үзен белдерү чарасы булып тора. Моңа охшаш конкурслар халкыбызның мәдәниятен һәм гореф-гадәтләрен саклап калырга ярдәм итә. Барлык катнашучыларга да уңышлар һәм матур чыгышлар телим", - диде ул.
Катнашучылар алты сынау үттеләр, аларда татар телен һәм мәдәниятен белүләрен, үз-үзләрен тәкъдим итү күнекмәләрен, милли киемнәр һәм ашамлыкларны, иҗади номерларны (җырлар, биюләр, шигырьләр уку), татар халкының гореф-гадәтләрен һәм йолаларын белүләрен күрсәттеләр.
Конкурс нәтиҗәләре буенча «Татар кызы–2025» номинациясендә Рузилә Мортазина (Иске Иштирәк мәктәбе) җиңүче булды, "Татар егете–2025" номинациясендә барлык катнашучылар да матур чыгышлары өчен билгеләп үтелде. Җиңүчеләр һәм катнашучылар дипломнар, сертификатлар һәм истәлекле бүләкләр алдылар.
Чара Бөтендөнья татар конгрессының Лениногорск бүлеге, «Ак калфак» татар хатын-кызлары иҗтимагый оешмасы һәм Г. Тукай исемендәге үзәк китапханә тарафыннан оештырылды.
Конкурс ярыш кына түгел, яшьләрне туган як традицияләрен саклап калу омтылышында берләштергән татар мәдәниятенең якты бәйрәменә дә әверелде.