Лениногорск мэриясендә ТР Гадәттән тыш хәлләрне кисәтү һәм бетерү һәм янгын куркынычсызлыгын тәэмин итү комиссиясенең күчмә утырышы узды
Бүген Лениногорск мэриясендә Татарстан Республикасының гадәттән тыш хәлләрне кисәтү һәм бетерү һәм янгын куркынычсызлыгын тәэмин итү комиссиясенең күчмә утырышы узды. Утырышны комиссия рәисе урынбасары-Татарстан Республикасы Премьер-министрының беренче урынбасары Рөстәм Нигъмәтуллин үткәрде.
Утырышны ачып, ул, янгынга каршы чаралар үтәлүгә карамастан, эссе һава торышы 14 урман янгыны барлыкка килүгә китерде, шуларның 12се республиканың көньяк-көнчыгышында, дип билгеләп үтте. "Җитәкчеләргә, урман хуҗалыгы хезмәткәрләре белән берлектә, бу хәлне җентекләп тикшерергә һәм тиешле чаралар күрергә кирәк", - диде ул.
Синоптиклар фаразлавынча, якын көннәрдә Татарстан территориясендә урманнарда, бигрәк тә көньяк-көнчыгышта янгын куркынычының югары классы сакланачак.
Татарстан Республикасы Урман хуҗалыгы министры Равил Кузюров республиканың көньяк-көнчыгышы сәнәгать структурасына бай булуын, биредә нефть-газ секторы һәм урман массивларында линияле объектлар урнашуын билгеләп үтте. Болар барысы һәм югары температура режимы урман янгыннарына китерде. «Бүгенге көндә барлык учаклар да локальләштерелгән, вәзгыять контрольдә», - диде ул.
Министр хәбәр иткәнчә, Татарстанда янгын куркынычы югары булу сәбәпле, бүгенге көннән башлап бу сезонда бишенче тыю кертелгән.
"Урманда янгын куркынычсызлыгын 20 урман янгыннары станциясе тәэмин итә. Хәзерге вакытта Татарстанда янгын куркынычы булган хәлләргә, авиация һәм җир өсте торышына космик мониторинг үткәрелә, шулай ук урманнарны янгынга каршы төзекләндерү буенча чаралар комплексы гамәлгә ашырыла. Халык арасында урманнарда янгын куркынычсызлыгы кагыйдәләрен үтәү буенча агитация-аңлату эшләре алып барыла", - дип өстәде ул.
Утырыш барышында Лениногорск һәм Әлмәт муниципаль районнарының район комиссияләре рәисләре вәзгыять турында кыскача отчетлар белән чыгыш ясады. Лениногорск районы Башкарма комитеты җитәкчесе Зөлфия Михайлова билгеләп үткәнчә, ел башыннан янгыннар белән хәлне тотрыкландыру максатыннан гадәттән тыш хәл һәм янгын куркынычсызлыгы комиссиясенең 12 утырышы үткәрелгән. Районда 25 профилактик төркем эше оештырылган, халык арасында актив профилактик эш алып барыла, автоном янгын хәбәрчеләре кую дәвам итә. Аның сүзләренә караганда, янгынга каршы чаралар үтәлүгә карамастан, эссе һава торышы Лениногорск урманчылыгы территориясендә урман янгыны барлыкка килүгә китергән.
«Шәһәрнең янгын сүндерү бүлекләренә, нефть предприятиеләренә, авыл хуҗалыгы товар җитештерүчеләренә янгынны сүндерүдә күрсәткән ярдәмнәре өчен рәхмәт белдерәсем килә. Районның янгын куркынычсызлыгы аерым контрольдә», - диде ул.
Татарстан Республикасы Премьер-министрының беренче урынбасары Рөстәм Нигъмәтуллин утырыш ахырында бүгенге көндә бу янгыннарның зур территорияләрдә таралуына юл куелмавын ассызыклады. «Безнең төп бурыч-аларны булдырмау, монда һәр җитәкченең, һәр кешенең җаваплы мөнәсәбәте мөһим", - диде ул.