Татарстан эшкуарлары хезмәткәрләргә хезмәт хакы түләү өчен процентсыз кредитлар алачаклар
Татарстан эшкуарларының хезмәткәрләргә хезмәт хакын түләү өчен нуль процент ставкасы булган кредитларны рәсмиләштерү мөмкинлеге барлыкка килде. Мондый ярдәм чарасы РФ Икътисадый үсеш министрлыгы Россиянең 14 банкы белән процентсыз кредит бирүне финанслау турында килешүгә кул кую аркасында барлыкка килде. Аерым алганда, программага Ак Барс Банк кушылды, тагын берничә республика банкы тоташуга гаризалар җибәрде.
Бүгенге көндә имзаланган банклар арасында - Сбербанк, ВТБ, Промсвязьбанк, Ак Барс Банк, Альфа-банк, Кузнецкий, Саровбизнесбанк, РНКБ, МСП, Челябинвестбанк, Открытие, банк Акцепт, ВладбизнесБанк, Томскпромстройбанк. Программада катнашу өчен гаризалар кабул итү дәвам итә.
Әйтик, узган атнада республикада РФ Хөкүмәте һәм Үзәк банкы белән берлектә 100% субсидияләү программасын эшләүдә катнашучы һәм пилот кредит оешмалары сыйфатында чыгыш ясаучы Сбербанк һәм ВТБ тарафыннан Татарстанның 48 предприятиесе өчен гомуми суммасы 104 млн сумлык 0% кредит алу өчен гаризалар хупланды. Акчалар эш урыннарын саклауга һәм хезмәт хакын түләүгә юнәлдереләчәк, бу кече һәм урта эшмәкәрлек секторында эш белән тәэмин итүгә ярдәм итәчәк.
"Икътисад министрлыгы һәм аңа караган структуралар хупланган кредитлар буенча абсолют саннарны гына түгел, ә эшкуарлардан кергән һәм канәгатьләндерелгән гаризалар белән чагыштыруны да игътибар белән анализлаячак. Әгәр бер банк үз клиентларына, башкаларга караганда, кимрәк лояль булса, сәбәпләрне аерым ачыкларбыз һәм һәр банк белән эш алып барачакбыз", - дип билгеләп үтте икътисад министры Мидхәт Шаһиәхмәтов.