Лениногорскида Ватан Геройлары көненә багышланган тантаналы чара узды
Лениногорск туган якны өйрәнү музеенда Ватан Геройлары көненә багышланган тантаналы чара узды. Чакырылучылар арасында ветераннар, иҗтимагый оешмалар, авыл җирлекләре вәкилләре, шәһәр учреждениеләре җитәкчеләре, мәктәп укучылары, Лениногорск нефть техникумының «Патриот» түгәрәге әгъзалары бар иде.
Лениногорск муниципаль районы Башкарма комитеты җитәкчесе урынбасары Владимир Друк җыелучыларны сәламләде һәм Бөек Ватан сугышы елларында илебезнең киләчәге өчен гомерләрен биргән якташларыбызның Бөек батырлыгын искә төшерде. Ватан Геройлары көне тирән мәгънәгә ия, һәм хәзерге буын якташларыбызның батырлыкларын искә алырга һәм сакларга тиеш, дип ассызыклады ул.
Безнең районнан Бөек Ватан сугышына 11 мең 666 кеше киткән, шуларның яртысыннан артыгы яу кырында ятып калган. 12 якташыбыз Советлар Союзы Герое исемен алды, өч якташыбыз Дан орденының тулы кавалерлары булды. Алар турында туган якны өйрәнү музее хезмәткәрләре җентекләп сөйләде. Алып баручылар билгеләп үткәнчә, Бөек Ватан сугышының күп кенә битләре әле ачык түгел, эзтабарлар яңа каберләр таба, бүләкләр әле дә үз геройларын эзли.
Кайчагында бүләк тапшырылган булган, ләкин югалган, кемнеңдер сугыш вакытында, кемнеңдер сугыштан соң. Якташларыбызның мондый ике бүләге табылган һәм Әлмәт шәһәренең «Танкчылар союзы» төбәк иҗтимагый оешмасының Әлмәт бүлегенә тапшырылган. Архив белешмәләре буенча Кузайкино авылында туып-үскән сержант Сергеев Илья Ивановичка «Батырлык өчен» медале 1943 елның 12 ноябрендә тапшырыла, ә Сарабикол авылында туып-үскән Гилалов Закир Гаяз улына «II дәрәҗә Ватан сугышы ордены» бирелә.
Әлмәт кунагы, Оборона министрлыгы пенсионеры Рамил Бәдретдинов «Танкчылар союзы» Әлмәт бүлегенең яңа хәрәкәте турында сөйләде һәм Закир Гаяз улының улы Фазил Гилаловка әтисенең орденын тапшырды.
Чара ветераннар, студентлар чыгышы белән дәвам итте. Һәлак булганнарны бер минут тынлык белән искә алдылар.