Лениногорскилылар ГТО нормативлары тапшырды

Узган атнаның шимбәсендә  лениногорскилылар “Хезмәткә һәм оборонога әзер бул” бөтенроссия физкультура-спорт комплексының көзге фестиваленә кушылды. Яшьләр, олылар, предприятиедә эшләүчеләр һәм студентлар – барлыгы йөзгә якын кеше ГТО нормативлары тапшырды.

Иртәдән үк спортчыларның кәефе күтәренке иде. 1нче спорт мәктәбенең манеженда алар озынлыкка сикерде, 1 минут эчендә тиз генә пресс ясады, тартылдылар, ир-егетләр гир күтәрде, спорт ядрәсе ыргыттылар, шулай ук 2 һәм 3 километрга йөгереп, җиңел атлетика тапшырды.

Моның белән генә фестиваль тәмамланмады: “Яшьлек” спорткомплексындагы  тирга барып, пневматик винтовкадан атып карадылар. Йөзү буенча нормативларны тапшыру 18 ноябрьдә “Юбилейный” бассейнында булачак. ГТО сынауларын 6 яшьтән 70 яшькә кадәр  теләүче һәркем тапшыра ала.

ГТО физкультура-спорт комплексының бик яхшы билгесен алыр өчен бары берничә шартны гына үтәргә кирәк.

- Рәсми интернет-порталда www.gto.ru теркәлеп, идентификация номеры алырга, шәхси кабинет булдырыла. Анда нәтиҗәләр дә күренәчәк.

- ГТО сынауларын тапшыру өчен тест үзәгенә гариза тапшырырга, (Шашин урамы, 20нче йорт, 3 кат)

- Яшәү урыны буенча поликлиникага барып, физик культура, спорт белән шөгыльләнергә ярый дигән медицина белешмәсе булу кирәк

- Нормативларны тапшыру көнендә үзәккә килеп теркәлергә, үзегез белән документ һәм медицина белешмәсе булу тиеш. Физик күнегүләр алдыннан мускулларны яздырып алырга онытмагыз.

- Барлык бирем-сынауларны “бик яхшы” билгесенә тапшырганнан соң, 6 ай дәвамында уку яисә эш урынында бүләкләү тантанасы булачак. Анда билге һәм таныклык тапшырачаклар. Шәхси кабинетта нәтиҗәләрне карап, күзәтеп барырга онытмагыз.