Татарстанлылар хәзер йорт хайваннарын почтада талпан тешләүдән иминиятләштерә ала
Быелдан башлап республиканың барлык почта бүлекчәләрендә этләрне һәм мәчеләрне талпан тешләүдән иминиятләштерергә мөмкин.
Иминият яклавы кирәкле ветеринария чараларының тулы исемлеген үз эченә ала: терлекне тешләгәннән соң карау, клиникада талпан алу, мондый юл белән йога торган авыруларны диагностикалау, шулай ук алга таба дәвалау. Түләүне алу өчен иминият компаниясенә ветклиникадан расланган документлар, хезмәтләр өчен түләү турында чеклар һәм банк реквизитлары җибәрү дә җитә.
Әгәр хайван талпан тешләве аркасында авырса, шул исәптән пироплазмоз (бабезиоз), эрлихиоз, боррелиоз, анаплазмоз яки энцефалит кебек куркыныч инфекцияләр алса, дәвалау һәм диагностика өчен түләү 25 000 сумга кадәр тәшкил итәчәк.
Полисның гамәлдә булу вакыты 12 айга 550 сумга төшә.
"Иминият полисы йорт хайваннары хуҗалары өчен кирәкле профилактика чараларына: хайваннарны талпаннардан вакытында эшкәртүгә, саклагыч комбинезоннар куллануга һәм йөреп кайтканнан соң җентекләп тикшерүгә файдалы өстәмә булачак", - дип билгеләп үтте Россия Почтасының төбәк идарәсе директоры Илнур Мәхмүтов.