Ю.Гагарин исемендәге Үзәк балалар китапханәсендә Балалар китабы атналыгы ачылды
Лениногорск шәһәренең Ю.Гагарин исемендәге үзәк балалар китапханәсендә балалар китабы атналыгы - балалар өчен әдәбиятны популярлаштыруга юнәлдерелгән ел саен үткәрелә торган Бөтенроссия акциясе башланды. «Балачактан һәм мәңгегә китаплар -иң яхшы дуслар» чарасына 17 нче балалар бакчасында тәрбияләнүчеләр чакырылган иде.
Китапханәче нәни китап сөючеләр белән әлеге бәйрәмнең - балалар китабы атналыгының мавыктыргыч тарихы белән уртаклашты. Ул бу бәйрәмнең ничек һәм кайчан барлыкка килүе, аның илһамчысы кем булуы һәм Китап атналыгын бөтен ил буйлап билгеләп үтә башлаулары турында сөйләде.
Балалар Алексей Толстойның «Золотой ключик, или Приключения Буратино»әкиятенең геройлары — төлке Алиса һәм мәче Базилио пәйда булгач җанланды. Бу персонажлар балалар өчен мавыктыргыч биремнәр һәм күп санлы конкурслар, табышмаклар һәм сынаулар әзерләгән иде. Әдәби бәйрәм күңелле һәм уңай нотада узды һәм балаларга бик ошады.
Малайлар һәм кызлар китапханәдән бик яхшы кәефтә һәм кызыклы китаплар белән чыгып киттеләр.