Лениногорск шәһәрендә Урай делегациясе булып китте
Лениногорск шәһәренә дусларча рәсми визит белән Урай шәһәреннән делегация килде. Делегация составында шәһәр башлыгының беренче урынбасары Михаил Данилов, урынбасарлар Светлана Новоселова һәм Елена Подбуцкая, шулай ук Урай Думасы депутаты Евгений Ребякин бар иде.
Күптән түгел Лениногорск шәһәренә Урай башлыгы Тимур Рәис улы Закирҗанов килеп китте. Нәкъ менә аның инициативасы белән биш ел элек Лениногорск һәм Урай арасында хезмәттәшлек турында килешү имзаланган иде.
Ике көн кунаклар Лениногорск шәһәре белән актив таныштылар. Беренче көнне алар 2 нче мәктәптә, «Долголетие» социаль ярдәм үзәгендә, Мәдәният сараенда булдылар, ТИҮләрнең эше белән таныштылар һәм нефть техникумында булдылар. Шулай ук делегация Шөгер авылындагы Нефть музеенда булды.
Визитның икенче көнендә кунаклар сәнәгать һәм агросәнәгать секторының үсешен күрү өчен сәнәгать паркларына юнәлделәр. Алар «Ленмаш заводы» металл конструкцияләре заводы эше, металл каркаста мебель җитештерүчеләр («Модуль» компаниясе) һәм «Сәяр»мебель салоны белән таныштылар. Экологик чиста кыяр һәм помидор үстерү белән дан тоткан «Виктория» КФХ кунакларга аеруча нык тәэсир итте.
Безнең шәһәрләр күп яктан охшаш. Урай-шулай ук нефтьчеләр шәһәре, ул Көнбатыш Себер нефтен беренче ачучы булып санала. Быел ул юбилеен – 60 еллыгын билгеләп үтә.