Лениногорск районы Сугышлы авылында халык җыены узды
Җирлек башлыгы Альбина Зыятдинова авыл халкы алдында доклад белән чыгыш ясады һәм 2024 елда башкарылган эшләр турында сөйләде.
Сугышлы авыл җирлеге составына ике торак пункт - Сугышлы һәм Юлтимер авыллары керә. Бүгенге көндә 408 йорт хуҗалыгында 843 кеше яши. Быел 2 бала туган, 15 кеше вафат булган. 280 пенсионер, 46 инвалид . Тимәш мәктәбендә - 28 укучы, Сугышлы мәктәбендә 4 укучы белем ала. 3 укытучы һәм 6 хезмәткәр эшли. Балалар бакчасына 5 бала йөри, 2 хезмәткәр эшли.
2024 елда ике авылда да балалар мәйданчыклары төзелгән. Юлтимер авылында мәйданчык үзара салым акчасына төзелгән, ә Сугышлы авылында – авыл территорияләрен төзекләндерү программасы кысаларында. Мәйданчыкны мәктәп һәм балалар бакчасы янәшәсенә урнаштырганнар. Киләчәктә мәйданчык янында универсаль спорт мәйданчы төзергә планлаштыралар.
Киләчәктә бу урында махсус хәрби операциядә катнашучылар хөрмәтенә парк булдырырга хыялланалар. Бүгенге көндә махсус хәрби операциядә 22 егет катнаша. Әмма, кызганычка каршы, һәлак булган егетләр дә бар, аларны бер минут тынлык белән хөрмәтләделәр.
Шунысын да билгеләп үтәргә кирәк, сугышлылар безнең районда беренчеләрдән булып маскировка челтәрләре үрә башладылар. Бүгенге көнгә 100 дән артык челтәр әзерләнгән. Альбина Петровна матди ярдәм күрсәткән һәм үз көчләре белән ярдәм иткән авыл халкына, авыл мәдәният йорты һәм китапханә хезмәткәрләренә рәхмәт белдерде. Җыелган акчага материаллар сатып алалар, челтәрләр ясыйлар, хәрбиләргә даими рәвештә гуманитар ярдәм һәм посылкалар җибәрәләр.
Республикада үзара салым программасы эшли. Сугышлы һәм Юлтимер авылларында яшәүчеләр бу программада актив катнашалар. Җыелган акчалар халык ихтыяҗларына: урамнарны яктыртуга техник хезмәт күрсәтүгә, юлларны ремонтлауга һәм юлларны кардан чистартуга тотыла.
Мәсәлән, 2024 елда җыелган акчалар хисабына Юлтимер авылында балалар таганнары һәм карусельләре сатып алынган һәм урнаштырылган. Ә Сугышлы авылында «ТАТНЕФТЬ» ГАҖ гранты хисабына Насосная, Гафиятуллин һәм үзәк урамнары буйлап яңа су линияләре салынган. Эшләр быел да дәвам итәчәк. 2025 елда җыелачак үзара салым акчалары урамнарны яктыртуга, юлларны тигезләүгә, карны чистартуга, авария хәлендәге агачларны чистартуга, Сугышлы авылында насос урамындагы күперне ремонтлауга, Юлтимер авылында «Мидхәт» чишмәсен төзекләндерүгә юнәлдереләчәк.
Альбина Петровна төбәк юлын реконструкцияләү уңаеннан район һәм республика җитәкчелегенә рәхмәт белдерде. "Без бу юлны озак еллар көттек. Яңа юл ачылу белән күп кенә проблемалар хәл ителә: авылга такси, ашыгыч ярдәм машиналары, товар төялгән йөк машиналары көчкә генә барып җитә иде. Хәзер балалары һәм оныклары әти - әниләре, ди-бабайлары янына бик теләп кунакка кайталар», - дип хис-кичерешләре белән уртаклашты ул.