Лениногорск мэриясендә террорчылыкка каршы комиссия утырышы узды
Бүген мэриянең утырышлар залында район башлыгы, шәһәр мэры Рәгать Хөсәенов рәислегендә Лениногорск муниципаль районының террорчылыкка каршы комиссиясе утырышы узды.
Утырышта комиссия әгъзалары, хокук саклау органнары вәкилләре, муниципаль учреждениеләр җитәкчеләре, районның авыл җирлекләре башлыклары һәм башка җаваплы затлар катнашты.
«Җирле үзидарәнең вәкиллекле органнарына өстәмә сайлаулар әзерләү һәм үткәрү чорында террорчылык янауларын кисәтү, җәмәгать иминлеген һәм хокук тәртибен тәэмин итү буенча өстәмә чаралар һәм Лениногорск районында миграция хәле турында» доклад белән полиция начальнигы урынбасары, җәмәгать тәртибен саклау начальнигы Андрей Иванчин чыгыш ясады.
Муниципаль районның террорчылыкка каршы комиссиясе секретаре Гөлнара Аглиева Лениногорск муниципаль районында «2021-2023 елларга террорчылыкны һәм экстремизмны профилактикалау» муниципаль программасын гамәлгә ашыру буенча эшнең торышы һәм чаралары турында сөйләде. Ул шулай ук муниципаль программаны тормышка ашыру барышы һәм финанслау нәтиҗәләре белән таныштырды.
Зеленая Роща авыл җирлегендә терроризмны һәм экстремизмны профилактикалау буенча эшчәнлекнең торышы, шул исәптән әлеге территориядә булган затлар белән эшләү буенча авыл җирлеге башлыгы Артемий Потапов чыгыш ясады.
«Логос» үзәге директоры Ольга Ященко терроризмга каршы көрәштә теләктәшлек көненә багышланган чаралар турында сөйләде. Шулай ук профилактик исәптә торучы балалар һәм яшүсмерләр белән эшләү турында да хәбәр итте.
Утырышка йомгак ясап, Лениногорск районы башлыгы Рәгать Хөсәенов Лениногорск районы территориясендә гадәттән тыш хәлләргә юл куймау буенча барлык кирәкле чараларны күрергә кирәклеген билгеләп үтте. Авыл җирлекләре башлыкларына криминаль характердагы барлык очраклар турында хәбәр итәргә, килүчеләр турында тиешле хезмәтләргә хәбәр итәргә, үз территорияләрендә бик сак булырга кирәк, диелде.
Барлык каралган мәсьәләләр буенча карарлар кабул ителде, халык иминлеген тәэмин итү буенча тиешле йөкләмәләр бирелде.