Рөстәм Миңнеханов яңартылган Яшьләр үзәгендә булды
Бүген Татарстан Республикасы Рәисе Рөстәм Миңнеханов капиталь ремонттан соң ачылган Яшьләр үзәгендә булды. Үзәк буенча экскурсияне Татарстан Яшьләр эшләре министры Ринат Садыйков һәм Яшьләр үзәге директоры Елена Демакина үткәрде. Шулай ук сәфәрдә Рөстәм Миңнехановны Лениногорск районы Башлыгы, шәһәр мэры Рәгать Хөсәенов озатып йөрде.
Яңартылган үзәктә төрле яшьтәге яшьләр өчен төрле кызыксынулар белән 19 юнәлеш буенча мәйданчыклар булдыру планлаштырыла. Капиталь ремонттан соң Лениногорск яшьләренә киңәшмәләр, видеоконференцияләр, презентацияләр, очрашулар һәм тренинглар өчен заманча конференц-зал һәм башкалар барлыкка килде.
Шулай ук үзәктә бию һәм репетиция заллары бар, анда теләгән һәркем үзенең иҗади идеяләрен тормышка ашыра һәм иҗат белән шөгыльләнә алачак. Заманча тренажер залы яшләргә спорт белән шөгыльләнергә мөмкинлек бирәчәк.
Кунаклар яңартылган кабинетларны, репетиция, яшьләр өчен тренинглар, мастер-класслар, яшь гаиләләр өчен уен зоналарын карадылар.
ТР Яшьләр эшләре министры Ринат Садыйков билгеләп үткәнчә, яшьләр үзәкләренең матди базасын капиталь ремонтлау һәм ныгыту программасы 2020 елдан гамәлгә ашырыла. Бу вакыт эчендә 1,076 млрд сумлык 16 яшьләр үзәге ремонтланган.
Шулай ук яшьләр үзәге территориясендә республика Рәисе Рөстәм Миңнеханов, Лениногорск районы Башлыгы Рәгать Хөсәенов «Мәктәпкә җыенырга ярдәм ит» хәйрия акциясендә катнаштылар, портфельләрне 60 беренче сыйныфка баручы укучы алды.