Лениногорскилы алдарлар тозагына эләккән
Россия Эчке эшләр министрлыгының Лениногорск районы буенча бүлегенең дежур частенә 20 яшьлек кеше мошенниклык турында гариза белән мөрәҗәгать иткән.
Аның сүзләренә караганда, социаль челтәрләрдә автомобиль акустикасы уйнатылган аккаунтка юлыккан. Яшь кеше кызыксына һәм катнашырга теләвен яза. Тиздән аның хәбәренә катнашучы номеры бирелүе турында җавап килә. Шулай ук оештыручылар гариза бирүченең яше һәм аның акустик система урнаштыруны нинди машинага планлаштыруы турында да кызыксыналар.
Икенче көнне ярыш нәтиҗәләре буенча гариза бирүченең җиңүче булуы турында хәбәр килә.Автотавыш комплектын Хакасия Республикасының Абакан шәһәренә килеп алырга кирәк дип хәбәр итәләр. Мөрәҗәгать итүче үзенең призын транспорт компаниясе аша җибәрүләрен сорый. Лениногорск кешесе ярышны оештыручылар җибәргән сылтама буенча узып, кирәкле барлык мәгълүматларны тутыра, банк картасы номерын да җибәрә. Шуннан соң, оештыручылар элемтәгә керүдән туктый. Ә лениногорскилы картасыннан тиешле суммадан да күбрәк акча югалганын аңлый. Зыян 14 мең сумнан артып китә.
Хәзерге вакытта полицейскийлар җинаятьчеләрнең шәхесләрен билгеләүгә юнәлдерелгән оператив-эзләү чаралары комплексы үткәрәләр. Җинаять эше кузгатылды.
Россия Эчке эшләр министрлыгының Лениногорск районы буенча бүлеге чираттагы тапкыр гражданнарга игътибарлы булырга киңәш итә.
Әгәр дә сез җинаятьчеләрнең корбаны булсагыз, кичекмәстән полициягә «02»телефоны аша хәбәр итегез.