Лениногорскилы фатир сатып алам дип акчаны мошенникларга күчерә

2021 елның 9 апреле, җомга

Лениногорскилы 34 яшьлек хатын-кыз фатир эзләгәндә алдакчылар тозагына эләгә һәм 20 мең сумны мошенникларга тапшыра.

Хокук саклау хезмәткәрләре ачыклаганча, хатын-кыз фатир сату буенча игъланны популяр булган күчемсез милек эзләү кушымтасы аша таба. Объектның бәясе базар бәясеннән түбән булгач, хатын-кыз игъланда күрсәтелгән телефон номеры аша  шалтыратып белешергә уйлый. Сөйләшү барышында сатучы 120 мең сум күләмендә задаток сорый. Фатир сезнеке булачак дип әйтеп тә куя.

Хатын-кыз ышана да, ышанмый да, шунлыктан әйтелгән сумманы тулысынча түгел, 20 меңне генә счетка күчерә. Шуннан соң фатир сатучы белән элемтә югала.

Әлеге факт буенча җинаять эше кузгатылган.